Yangiliklar World7.uz
14-октябр куни АҚШ Ташқи ишлар хизматининг юқори мартабали дипломати Жонатан Хеник АҚШнинг Ўзбекистондаги элчиси сифатида қасамёд келтирди.
Аввалроқ Жонатан Хеник Туркиянинг Истанбул шаҳрида бош консул лавозимида ишлаган. Бунгача у Миллий мудофаа университетининг Ахборот ва кибермакон коллежида АҚШ Давлат департаменти кафедрасининг раҳбари лавозимида ишлаган. Ундан аввал Давлат котибининг Марказий Осиё, жамоатчилик дипломатияси ва матбуот бўйича ёрдамчиси ўринбосари лавозимида ишлаган. У, шунингдек, Глобал ҳамкорлик маркази (GEC) координатори ўринбосари бўлиб ишлаган ва ушбу лавозимда АҚШ ҳукуматининг Россия, Хитой ва Эрондан келаётган дезинформацияларга қарши курашиш бўйича барча саъй-ҳаракатларини бошқариш ва мувофиқлаштиришда ёрдам берган. Шунингдек, жаноб Хеник Халқаро ахборот дастурлари бюроси мувофиқлаштирувчисининг биринчи ўринбосари ва координатори вазифасини бажарувчи лавозимларида ишлаган. Илгарроқ у Давлат котиби ёрдамчиси ўринбосари вазифасини бажарувчи ҳамда Жанубий ва Марказий Осиё бўйича бюронинг матбуот ва жамоатчилик дипломатияси бўйича директори лавозимларида ишлаган ва ушбу лавозимда ўн учта давлатда, жумладан Афғонистон, Покистон ва Ҳиндистонда АҚШнинг жамоатчилик дипломатиясини олиб боришга масъул бўлган.
Жаноб Ҳеник Туркияда АҚШ элчихонасининг жамоатчилик билан алоқалар бўйича маслаҳатчи, Шарқий Тиморда эса миссия бошлиғи ўринбосари, шунингдек Озарбайжон, Туркия, Португалия ва Ўзбекистонда бошқа лавозимларда ишлаган. У эришган ютуқлари учун Жамоатчилик дипломатияси битирувчилари ассоциациясининг мукофоти, шунингдек, Давлат Департаментининг юқори фахрий мукофотларини олган. Ню-Йоркда таваллуд топган Жонатан Хеник рус, португал, турк ва озарбайжон тилларини яхши билади, Гавайи университетининг сиёсат фанлари бўйича докторлик унвони ва Колумбия университетининг халқаро алоқалар бўйича магистр унвонига эга.
